كلمات اغنية مرسال لحبيبتي علي الهلباوي و مسار اجباري

مرسال لحبيبتي
حبيبتي شرطه مايله فراغ
وهكتب ليه حروف اسمك
ما هو انتي ف قلبي ساكنه القلب عارفه بقصتي وحالي
ومين غيرك في قلبي اكتبله مرسالي
واما بعد
مانيش عارف جوابي دا جوابي الكام
ما عدتش بحسب الصفحات
ما عدتش بحسب الاقلام
ما عدتش بحسب اللي ضاع من الاحلام
كفايه اني بحبك بس
وقلبك لو بقلبي حس
او شاف حاله في بعادك
لصلى لربه واستغفر لذنبه وصام
قوليلي ازاي احبك حب يرضيكي
انا تايه ونفسي اوصل اراضيكي
دا لو كان الهوا بالسهد انا سيده
ولو قلتي ان حبك صوم انا عيده
ولو حبك فداه قلبي
اقطع قلبي ميت مره واقدملك عناقيده
وبتقولي بحبك ليه
وهو القلب متعذب كده بايده
بحبك حتى لو باب القبول اتسد
وهاتخيل صدى صوتي بياخد كلمتي ويرجع معاه الرد
ولو قلتيلي ميت مره “انا عمري ما حبيت حد”
هزيد الكلمه ميت مره
دي نقطه ميه م المطره اذا فاضت تهد السد
وحتى لو فارقتيني هاحبك في الفراق برضه
هواكي ف قلبي لو شفتيه نوافله وسنته وفرضه
وحبك ارضه لو تنسيه هينسى ازاي حنين ارضه
وياما ف نفسي ياما ف نفسي تيجي لقلبي وتحني
ولازم تعرفي اني لا انا عفريت ولا جني بحبك
بس ايدي اقصر كتير مني
فمش هاقدر اجيب لك م الدهب كفه
واجيب لك م الياقوت كفه
ومش هاقدر اجيب الوالي في الزفه
ومش هاقدر اجيب لك بيت يموت القطر لو لف ف حماه لفه
كفايه اني بحبك موت
وحب الناس ندامه وعار
وحبي عكسهم عفه
ولو ترضي فعندي شروط
انا طبعا بحبك موت ولكن برضه ليا شروط
انا عايزك تكوني في الوريد دمه
وتبقي ف عقلي انا همه
وتبقي ورد جوه القلب غيري يشوفه يتحسر ولا يشمه
وعايزك تفهميني لو كلامي طل من رمشي
وعايز رمشك الجارح صراط يجرح فؤاد غيري مايرحمشي
وانا اجيلك اعدي فوق صراط رمشك ولا اخافشي
وحتى لو وقعت ف يوم من الخضه
اقع في عينيكي واتوضى
واصلي ركعتين لله وابوس نن العينين وامشي
لا انا طماع ولا ف طبعي الانانيه
بحبك وانتي انا طبعا وما اسمحشي لحد يكون شريك فيا
وقبل ما يخلص المرسال باعت لك من عينيا سؤال وهو الحب كان عيبه
ولو مره حلمت بضحكتك في النوم عليا تتحسب غيبه
وفي الاخر باعتلك ويا مرسالي الجديد احلام
بلاش ترميها كالعاده من اعلى البرج
وخايف يبقى مرسالي نهايته زي اجداده في قلب الدرج
جناين قلبي راح تفضل ولو طال البعاد فاتحه
بحبك قلتها بالكسره نفسي اسمعها بالفاتحه