كلمات اغنية المكيدة ( في فراشي ) محمد بلخياطي

في فراشي راقد وجا الهم مصادف
مكتوب ربي مكانش لي كان داري
فتشو لي داري واداوني مساعف
ضجه اندارت بلخف انطلقو اخبار
واشتا نحكي انا على عمري واشتا نخرف
مكيده نخدمت ما ننساهاش طول عمري
تخطيط امينه وخاوتها جاب هادف
صوموني رمضان في الحبس عند كبري
اعطات شهاده للشرطه بشي مزيف
باصاتني وبكاتني ويتمت الذراري
لو جات صله الاب فيها تكون عاطف
ما تهون لي كرامتي ولا تهون قدري
منين جات حاجه محتومه علي مسيف
مكان ما نقول نوكل لله امري
شي ما عملتوش ودارتني فيه طرف
في نهار واحد خربتني وخلات داري
حتى ابن امها واشهد باش يكحلو الملف
مكانش من استدعاه للشهاده وراح يجري
والله ما خذاش برايهم يا للاسف
لو جات بيديهم فيا واش راه صاري
يعيا الباطل يراوغ والدهر يكشف
الحق يرجع ليا ونفرح في انهاري
انسجنت في باطل ربي والناس تعرف
والله غالب علي ما قريتش حذري
ولكن الصح اجناحو ماهوش قاصف
يروح ويولي لمكانو كالقمري
لي ما عمل والو عمرو ما يكون خايف
يقطع البحور ولجبال ويزيد الصحاري
كانو ناويين يخلوني وحدي مجيف
وانا الله معاوني نزيد ليه شكري
الشجره لي زبرولها عرافها تزيد تخلف
قبل عام تقول لهم ذوقوا ثماري
من دار فيا الشر ما ننسى ولا نتلف
جرحني بجرح والجرح تخيط راه باري
طحت ونضت وراني ما زل واقف
انسان حساس وشاعل في القلوب ناري
معروف في كل مكان ومانيش تالف
والناس تعرفني ايذا كنت ضربت صدري
مانيش عايش كالبقره غير باش نعلف
عندي سلا ح لي باش نخلف بيه ثاري
ربي اكرمني واعطاني مخ باش نصرف
والخير ما يفارقنيش ايلا سكنت قبري
بسيط عايش متواضع مانيش لاهف
الموت كاينه ندي من الدنيا غير شبري
ولي دمرني للحبس ما عرفش كي تصرف
راح فيها من خدع باباه ديسباري