كلمات اغنية ما اجمل البادية محمد حسين ابو نصار

ما اجمل الباديه حيث القلوب السليه والجو ماطر وطل
حين الغواني على الانهار سيره وجيه يتبادلين القبل
تسمع غناهن وهن يتبادلين التحيه باشعارهن والغزل
يمشين صفين تتوسطهن البادعيه يرددين الهجل
يتزاقمين يرقصين الرقصه العبشليه بجدهن والهزل
وعاد لاشي زواجه تبصر الشارعيه تمسي بحاله ملل
تصيح يا معجبه يا مرشده يا تقيه ما هوش وقت الكسل
سيري وقولي لزوجش يدي البندقيه ولو حزامه عطل
يخرجوا بالمدافع ضبيه القانصيه من قبل يدخل زحل
من بعد ذلحين ما بش فايده يا صفيه اذا قد النجم زل
وابصر عجايب كثير اكثر من الاوليه دوشه ملان المحل
هذه تغني وهذه بالدرج طالعيه بثوبها والهصل
ومنهن جات توصل فاشره مهتريه تدخل وقالت ولل
ومنهن جرت الحنا وخبت شويه ودقته في عجل
وام الحريوه تظلي داخله خارجيه بظهر مثل الحكل
تبكي تهذرم وتدرس الحومريه وكمها قد نطل
وتخرج الباب تدعي لختها مبوريه جوا عندنا يا همل
واسمع رضيح التنك والدقه الحميريه والمحجره والزجل
وباخر الليل يقولين اخرجي يا هليه يا بنت ساس الدول
يرافقوش اخوتش واهلش طهوش البريه غمران كم من بطل
مسلحين النصال والازره الحاشديه كلن بصوته زمل
وابوش وفى مشاريطه وشل البقيه بطول صوته وجل
بنتي هليه وتشتي يا منصر بزيه مشاركه للعمل
اقل لك الصدق ما دام عاد بنتي هنيه والا فليش الشغل
وابو الحريو قال يا سعد الامور منجليه وساعده واحتمل
وام الحريو تنتظر بالدف والمرفعيه فانوسها مشتعل
تبدي وترجع وتصرخ اسكتي يا بنيه وليش هذا الزبل
قد الشواعه بدوا من راس فجره اميه وابصرت عمش نزل
ما دام نجم الصباح فوق الحمار معتليه قد السرور اكتمل
ودقت الدف وقالت ارحبي يا شليه الجمع فيك اشتمل
قد قارن المشتري نجم الصبي بالصبيه وابليس منا غفل
يا مرحبا باخوتش واهلش ومولى العنيه وابوش سيد المحل
والطحمري والمزمر دقوا الطحمريه كلين بطبله طبل
قد وصلوا الباب واصطفوا بشكل السريه وابو الحريو ارتجل
وقال يا اولاد عمي حال للواصليه من كان شاعر دخل
توسط الصف واحد بعد ما ادى التحيه وصاح من غير ملل
يا مرحبا بالعروس والضيف والوافديه مرحب يشق الجبل
مرحب ملان البلاد متساويه مستويه يخص من قد وصل
تقدم الضيف يشتي يقضي البادعيه بطول صوته وصل
حياكم الله وحيا القوم والسامريه ما الصيف مزنه همل
الله يديم السرور يا هل الشروع الوفيه طاب اللقا والامل
واخت الحريو يوم ثاني جات وادت هديه كعده وقعبي عسل
قبل الغداء يقبل الغرام وادى طليه الشعر فوقه هفل
يدخل من الباب في صوره وشيبه رضيه بلحفته والحكل
يتجمعوا للمقيل من ظهر واغلس شويه من سار صلى دخل
البعض جاء رادف المدعي مع الزمزميه الجار واهل المحل
وبعضهم بيده البور ي وربطه طريه والماء ملان المدل
والشيخ راس المكان قال اسكتوا يارعيه والعدل منه رقل
وخبرته كل واحد جاء بصوره زريه واشناب مثل السبل
واحد محنبش وثاني يلزم الحاضريه الشيخ مدكاه نسل
والقات عوارض معنى من يد القاطفيه والا بخاري قطل
صوت المزين ملان البيت تسمع دويه من كل يد انتول
هذا الجبا للحريو من احد الرافديه عشرين والا اقل
واحيان يدخل من الحجره وتبصر لويه وكم طلع كم نزل
والطفل ان صاح قال اسكت وخلي الاذيه وجر باذنه فتل
وبعدها يقفز الدوشان وسط الحويه بطول صوته وجل
يبدع يهذرم كانه يدرس الجلجليه يدي خبر مفتعل
وبعدما صاح في صوته بصرخه قويه وجر قرشه رحل